ഹാരിസൺ മലയാളം ലിമിറ്റഡിന് വയനാട്ടിലെ അഞ്ച് തേയിലത്തോട്ടങ്ങളും ഏകദേശം 2500 ഹെക്ടർ തേയിലയും ഒരു സിടിസി ഫാക്ടറിയും മൂന്ന് ഓർത്തഡോക്സ് ഫാക്ടറികളും ഉണ്ട്. അച്ചൂർ, ചുണ്ടെല്‍, അരപ്പറ്റ, ചൂരല്‍മല, സെൻ്റിനൽ റോക്ക് എന്നിവിടങ്ങളിലാണ് ഇവ സ്ഥിതി ചെയ്യുന്നത്. സെൻ്റിനൽ റോക്ക് എസ്റ്റേറ്റ് യഥാർത്ഥത്തിൽ ഈസ്റ്റ് ഇന്ത്യ ടീ ആൻഡ് പ്രൊഡ്യൂസ് കമ്പനി ലിമിറ്റഡിൻ്റെ (1907-08) ഉടമസ്ഥതയിലായിരുന്നു. 1890-കളിൽ അവർ ആദ്യമായി കാപ്പി നട്ടുപിടിപ്പിച്ചു. പിന്നീട് 1909-1910 കാലഘട്ടത്തിൽ അവർ തേയില കൃഷിയിലേക്ക് തിരിഞ്ഞു. ഏറ്റവും പഴയ തേയില ഉൽപ്പാദിപ്പിക്കുന്ന പ്രദേശങ്ങളിലൊന്നാണ് സെൻ്റിനൽ എസ്റ്റേറ്റ്. സമുദ്രനിരപ്പിൽ നിന്ന് ഏകദേശം 914 മീറ്റർ ഉയരത്തിലാണ് ഈ എസ്റ്റേറ്റ്, കോഴിക്കോട് - ഊട്ടി റോഡിൽ മേപ്പാടിയിൽ നിന്ന് 15 കിലോമീറ്റർ അകലെ സ്ഥിതി ചെയ്യുന്നു. സെൻ്റിനൽ എസ്റ്റേറ്റിൻ്റെ യഥാർത്ഥ കെട്ടിടം 1956-57 ൽ പൊളിച്ചുമാറ്റി 1958 ലാണ് ഇപ്പോഴത്തെ ഫാക്ടറി നിർമ്മിച്ചത്. ചൂരൽമലയിലെ സിപ്പ് ലൈനും സൈക്കിൾ സവാരിയും അട്ടമലയിലെ വ്യൂ പോയിൻ്റും പുത്തുമലയിലെ ക്യാമ്പിംഗും വിനോദസഞ്ചാരികളെ സെൻ്റിനൽ റോക്ക് എസ്റ്റേറ്റിലേക്ക് ആകർഷിക്കുന്നു.

മേപ്പാടിക്കടുത്തുള്ള ചൂരൽമലയിലാണ് അട്ടമല വ്യൂ പോയിൻ്റ്. ചുണ്ടയിൽ നിന്ന് അട്ടമലയിലേക്ക് 28 കിലോമീറ്റർ ദൂരമുണ്ട്. അട്ടമല വ്യൂപോയിൻ്റിലേക്കാണ് ടിക്കറ്റ് എടുക്കേണ്ടത്. ഡെക്സൺ എന്ന സ്വകാര്യ കമ്പനിയാണ് ഇപ്പോൾ വ്യൂപോയിൻ്റ് നടത്തുന്നത്. 40 രൂപയാണ് ടിക്കറ്റ് നിരക്ക്. കാഴ്ചകൾ കാണാൻ ഒരു വാച്ച് ടവർ ഉണ്ട്. മഞ്ഞുമൂടിയ മലകളാൽ ചുറ്റപ്പെട്ട അട്ടമല വ്യൂ പോയിൻ്റിൽ കയറിയാൽ ചെമ്പ്ര കൊടുമുടി, എടക്കൽ ഗുഹ, മീൻമുട്ടി വെള്ളച്ചാട്ടം എന്നിവയുടെ വിദൂര ദൃശ്യം ലഭിക്കും. കൽപ്പറ്റ ടൗണിൻ്റെ ഒരു ഭാഗം, സൂചിപ്പാറ വെള്ളച്ചാട്ടം, ഗൂഡല്ലൂരിൻ്റെ ഒരു ഭാഗം, ചാലിയാറിൻ്റെ ഉത്ഭവം എന്നിവയും ഇവിടെ നിന്ന് നമുക്ക് കാണാൻ കഴിയും. വിനോദസഞ്ചാരികളെ ആകർഷിക്കുന്നതിനായി അട്ടമലയിൽ കൃത്രിമ തടാകം നിർമിക്കാനും എസ്റ്റേറ്റ് മാനേജ്‌മന്റ്‌ പദ്ധതിയിടുന്നുണ്ട്.

മേപ്പാടിയിൽ നിന്ന് 12 കിലോമീറ്റർ അകലെയാണ് ചൂരൽമല സിപ്പ് ലൈൻ. 450 മീറ്റർ നീളമുള്ള സിപ്പ് ലൈനാണിത്. സിപ്പ് സൈക്ലിംഗും ഇവിടെ പരിചയപ്പെടാം. 300 രൂപയാണ് നിരക്ക്. ഒരു സ്വകാര്യ കമ്പനി പാട്ടത്തിനെടുത്താണ് സ്ഥാപനം നടത്തുന്നത്.